Äs hät ja langi Ziit so uusgseh, als findi das Jaahr dä Winter gar nöd schtatt. Das hetti dänn öisäm Bruuch, am Sächsilüütä dä Böögg als Symbol für dä Winter z’verbrännä, fascht d’Berächtigung entzogä. Die warmä Tämperatuurä händ für all die Politiker und Medieschaffendä wo sich mit Klimawandel und Klimaärwärmig so intensiv beschäftiget no bsunderä Aareiz gäh, ihri These und Meinigä luutschtarch z’proklamierä. Was jetzt da würkli söll uf öis zue cho hät au miich i letschter Ziit beschäftiget und drum wett ich s’hütigi Sächsilüütä mit ä paar kritischi Gedankä zum Thema “Klima und Energie im Fokus vo Politik und Medie“ äröffnä.

 

Nöiä Wind i die ganz Klimadiskussion inä braacht hät ja am Al Gore siin Film “An Inconvenient Truth“, än unbequämi Waret. Nach äm Al Gore siinerä Darschtellig schtö mir vor ämä eigentlichä planetaarä Nootfall: schmelzendi Iisschichtä a dä Pool, schtarchä Aaschtiig vo dä Meeresschpiegel, meh und schtärcheri Hurricans und än Invasion vo tropischä Chranketä. Und dr Al Gore liferet dänn grad au no d’Antwort, wie mir öis us därä Nootlaag chönnd befreyä: mär müend sofort öisä Läbässchtiil änderä: weniger Energie värbruuchä, weniger Autofahrä, weniger Schtroom värbruuchä.

 

I dä Mediä hät mär - vo wenigä Uusnahmä abgseh - die Thesä im sicher iidrücklichä und guet gmachtä Film vom Al Gore ziemlich unreflektiert übernoh; dä Gore hät ja öis versichered, dass d’Debattä über siini Ärkänntnis i dä Kreis vo dä Wüssäschafter värbii segi.

Dä Richard Lindzen, Profässer für atmosphärischi Wüssäschaft am renommiertä MIT i dä USA, hät scho s’letscht Jaahr druf hiigwisä, dass äs no kän Konsens gäbi i dä Fraag vo dä globaalä Ärwärmig und hät uf ä paar truly inconvenient facts hiigwisä, zum Biischpiil, dass d’Arktis scho im Jaahr 1940 so warm oder sogar wärmer gsi isch als hüt, dass d’Iisschichtä in Grönland im Durchschnitt wachsed und nöd schmelzed, und dass Malaria als aagäblichi Folg vo dä Klimaärwärmig frühner i dä USA und hüt immer no in Sibieri exischtiert, - - Mosquitos bruuched offäbar kei tropischi Wärmi.

 

Dä Profässer Lindzen wirft am Al Gore vor, dass är d’Tatsach ignorieri, dass d’Ärdä und ihres Klima so dynamisch sind, dass sie sich au ohni extärni Iiflüss schtändig verändered und dass d’Wätter- und d’Klimawüssäschaft no immer i somä primitiivä Schtadium segi, dass sich zum Biischpiil bezüglich Hüüfigkeit und Intensität vo Hurricans no kei Ursachä schlüssig naawiisä lösid.

 

D’Faktä zur globalä Ärwärmig und CO2 Konzentration i dr Atmosphärä lieged ja vor: Sit 1988 sind sich d’Klimaexpärtä einig, dass sich im Durchschnitt d’Tämperatuur im letschtä Jahrhundert um nu grad ä knapps Graad ärhöht hät, mit ärä signifikantä Schteigerig vo 1919 bis 1940, änärä Tempertuurabnahm vo 1940 bis an Aafang vo dä 70er Jaahr und dänn wieder ä Zuenahm bis i d’nünzger Jaahr und sit 1998 isch dä Wältdurchschnitt praktisch unverändered. Und au bi dä CO2 Konzentration isch mer sich einig, dass die sich sit mär si überhaupt cha mässä um rund 38% ärhöht hät und jetzt höcher isch als je i dä letschtä 650'000 Jaahr. D’Ursach für dä Aaschtiig söll vor allem bi dä Verbrännig vo Cholä und Ööl, bi dä Produktion vo Zemänt und bi dr Abholzig ligä.

 

S’CO2 isch hauptsächlich für dä Triibhuuseffäkt verantwortlich und mä hät bis hüt no kei Methodä gfundä, wie mer die gschtiegeni CO2 Konzentration i dr Atmosphärä wieder chönnti reduzierä. Und drum sötted mer jetzt vermehrt die Energieformä iisetzä wo wenig CO2 uusschtoosed und gliichziitig alli Energiä effiziänter nutzä. Klimapolitik isch drum hüt zwingend immer au Energiepolitik. Umgekehrt isch aber Energiepolitik nöd allei Klimapolitik. I dr Energiepolitik schpillt ja au d’Versorgigssicherheit ä wichtigi Rollä, dä Vladimir Putin laaht grüessä.

 

S’Klima kännt kei nationali Gränzä und drum hät Klimapolitik immer au ä globali Dimension. Wältwiit isch hüt dr Energiebedarf und d’Energienutzig no sehr underschiedlich. Die jüngschtä Zahlä zeiged, dass dr asiatisch pazifisch Ruum mit China, Japan und Indie hüt 31% vom wältwiitä Energieverbruuch beaasprucht, d’EU- und die russischä Länder knapp dähinder mit 29%, Nordamärika mit 27% und dänn wiit weniger Mittel- und Südamärika mit je knapp 5% und am Schluss Afrika mit nu 3% vom wältwiitä Energieverbruuch.

 

Hüt rolläd rund 800 Millionä Auto dur öisi Wält. Wänn sich d’Wältbevölkerig i abehbarer Ziit uf 10 Milliardä Lüüt ärhöht und sich än grossä Teil vo dene Lüüt au ämal wett äs Auto leischtä, so wird sich d’Aazahl Auto bald ämal uf 5'000 Millionä ärhöchä. Das wird aber nur möglich sii, wäm mir d’Effiienz vom Energieverbruuch chönd signifikant verbesserä. Dass bi därä Uusgangslaag ä globaali Klimapolitik sehr schwierig isch, ärinnered a die säb wältwiit Bevölkerigsumfraag wo d’Fraag gluutet hät: “Was bitte isch Ihri Meinig zum Mangel vo Energie im Rescht vo dä Wält?“ Die Umfraag isch än völligä Flop gsi:

 

- in Afrika hät niemer gwüsst was Energie isch;

- in Weschteuropa hät niemer gwüsst was Mangel bedüütet;

- in Oschteuropa hät niemer gwüsst was eigeni Meinig bedüütet;

- in Südamärika hät niemer gwüsst was bitte bedüütet;

- und in Amärika hät niemer gwüsst, wo dä Rescht vo dä Wält liit.

 

Mit globaler Klimapolitik beschäftiged sich zwei Organisationä: d’UNO, wo mit äm Kyoto-Protokoll bis is Jaahr 2012 verbindlichi Ziel für dä Uusschtooss vo Triibhusgaas, insbesonderi CO2 , feschtgleit hät und d’APP, die asiatisch-pazifisch Partnerschaft für suuberi Entwicklig und suubers Klima, wo sich Auschtralie, China, Indie, Japan, Korea und d’USA zur Förderig und Entwicklig vo suuberä Energietechnologiä zämmägschlossä händ. Die europäischä Länder händ s’Kyoto Protokoll underzeichnet und märked jetzt - wie au dä Moritz Leuenberger: “Ein Ziel zu nennen ist nicht schwer, es umzusetzen jedoch sehr“.

 

S’Kärnschtuck vo dä europäischä Politik um CO2 Konzentration z’reduzierä isch dä CO2 Emissionshandel, än schtaatlich kontrolliertä Handel, wo bis jetzt nöd funktioniert. Villi europäischi Länder wärded ihri CO2 Kyoto Ziel nöd erreichä. D’USA, obwohl si s’Kyoto Protokoll nöd underzeichned händ, zeiged sit äm Jaahr 2000 ä wesentlich chliinärs Wachstum vo dä CO2 Emmissionä als die europäischä Länder. D’Schtrategie vo dä Amerikaner setzt uf Aareiz und gueti Rahmbedingingä für privati Inveschtitionä, um suuberi und effiziänti Energiesyschteem z’entwicklä. Die schtaatlichä Uufgaabä wärded iigschränkd, die privaatä Initiativä belohnt. Bi öis hät mär ab und zue dr Iidruck, dass d’Klimaärwärmigs-Aktivischtä s’grösser Inträsssä händ d’Rollä vom Schtaat z’vergrösserä, als für’s Klima öppis z’tue.

 

Ändi Oktober s’letscht Jaahr hät dänn die änglisch Regierig dä 700 sii-tig Bricht über d’Klimaväränderig vom Nicolas Schtärn publiziert. Dä Bricht hät drum sovill Medieecho uusglööst, will är zum Schluss chunnt, dass dä Priis wämmer jetzt nöd sofort handled sehr hoch segi und dass umgekehrt ä sofortigs Handlä relativ wenig würdi choschtä. Dä Björn Lomborg, dä Tiräkter vom Copehage Consensus Center hät dänn dä alarmierendi Schtärn Report imä ganzsiitigä Biitrag im Wall Schtreet Journal nach Strich und Fadä värrissä und i villnä wesentlichä Pünkt widerleit. Dä Lomborg hät 24 UNO Botschafter vo dä wichtigschtä Länder, drunder China, Indie und d’USA gfröged, wie sie würded d’Prioritäätä setzä, um die gröschtä Usäforderigä uf därä Wält z’meischterä. Die Botschafter händ under Abwäägig vo Choschtä und Nutzä gseit, dass sie hüt z’erscht würded i Gsundheit, Nahrig, Wasser und i Uusbildig inveschtierä, bevor sie die globali Ärwärmig würded aagah. Dä Lomborg warnt dävor, dass mir öis nöd sötted dur sensationelli Angschtmacher-Mediebricht zu schlächtä Inveschtitionä värleitä laah.

 

Ändi Januar hät dän s’IPCC, s’Intergovernmental Panel on Climate Change vo dr UNO än erschtä Teil vo dä Zämmäfassig vo ihrem nöiä Klimabricht publiziert und am vorletschtä Samschtig isch dä zweiti Teil ärschinä. Die Zämmäfassigä sind nöd würkli vo dä wüssäschaftlichä Expärtä gschribä wordä, sondern vo dä sogenanntä Policy Makers. Äs wird betont, dass mit 90 prozäntiger Sicherheit dä Mänsch für d’Klimaärwärmig sit 1950 verantwortlich segi. Was die Zämmäfassigä nöd in Vordergrund schtelled, isch Tatsach, dass d’UNO ihri früehnerigä Voruussaagä hät müesä ganz wesentlich korrigierä. Im Bricht vo dr UNO vo 2001 hät mär voruusgseit, dass d’Meeresschpiegel bis is Jaahr 2100 bis zu drey Fuess, also öpä 90 Santimeter chönted aaschtiiigä. Im Bricht wo nächscht Monet usä chunnt, wird die Zahl uf 17 inch, also 43 Santimeter, uf rund d’Helfti reduziert.  Im nöiä Bricht, wo aafangs Mai söll ärschiinä, wird au klaar, dass mer dä mänschlich Iifluss uf d’Klimaveränderig sit dä induschtriellä Revolution um mindeschtens än Drittel überschetzt hät. Mä muess au wüssä, dass än Huufä Lüüt wo zu dene IPCC Bricht biiträged für Regierigä schaffed, wo anerä Klimaangscht i dä Bevölkerig äs Inträssä händ, um CO2 Reduktionsmassnahmä politisch chönnä duräz’setzä. A verschiedenä kritischä Wüssäschafter hät mär d’Mitarbet a dä IPCC Bricht verweigered.

 

Die Computer Modäll vo dr UNO wo voruusgseit händ, dass d’Meeresschpiegel sötted dramatisch aaschtiigä, händ au nöd voruusgseh, dass sich d’Meer sit äm Jaahr 2003 wieder abküehlt händ, sicher nöd das, was mer mit ärä Klimaärwärmig würdi ärwartä. Chüeläri Meerestämperatuurä schtelled jetzt aber au dä Zämmähang vo dr Klimaärwärmig und hüüfigerä und chreftigerä Hurricans wieder in Fraag. Äs git hüt Wüssäschafter wo d’Sunnäaktivität schtudiered und dr Meinig sind, dass d’Sunnäaktivitäät ällei für die jüngschti Klimaärwärmig verantwortlich isch. Äs wird nöd beschtrittä, dass dä CO2 Uusschtooss für d’Klimaärwärmig ä Rollä schpillt, aber die Lüüt sind dr Meinig, dass dä Nachwiis nöd so eidüütig isch, das mer jetzt inä eigentlichi Klimawandel-Hyschterie müessti uusbrächä.

 

Zrugg zu dä Schwiiz: Aafangs März hät s’beratendi Organ für Klimaänderig und d’Plattform für Climate und Global Change vo dä schwiizerische Akademie vo dä Naturwüssäschaftä ihri Prognosä für öises Land präsentiert: Bis is Jaahr 2050 sölled d’Durchschnittstämperatuurä im Winter, Früehlig und Härbscht um rund zwei Graad schtiigä und im Summer söllis knapp drüü Grad wärmer wärdä. Im Winter werded 10% meh Niederschlääg und im Summer 20% weniger ärwartet. Us sonigä Prognoosä lönd sich dänn natüürli sofort d’Iiflüss uf öisä Energiebedarf ableitä: Meh Schtroom zum chüelä i dä wärmere Sum-mer, weniger Energie zum Heizä i dä wärmere Winter. Apropos Schtroomproduktion i dr Schwiiz: 60% chunnt us Wasserchraft, 35% wird dur Kärnenergie ärzüügt. D’Forderig nach möglichscht vill CO2-frey produzierter Energie isch zugliich d’Forderig nach erneuerbaarä Energie und da schtaht nach Meinig vo dä Autoorä vo därä Schtudie i dä Schwiiz d’Wind- und Holzenergie im Vordergrund. Windenergie töönt guet und wird scho i villnä Länder ärfolgriich iigsetzt, nur mues mär au wüssä, dass d’Windenergie bezogä uf die produzierti Energiemängi dopplet so hochi Inveschtitionä bruucht wie d’Kärnenergie.

 

Wämmer aber würkli wänd dr Energieverbruuch vo jedem Einzelnä sänkä, bruuchts sehr vill meh. A dr ETH hät mer vor 9 Jaahr d’Idee vonärä 2000 Watt-Gsellschaft lanciert under äm Motto “weniger Energieverbruuch bi gliicher Läbäsqualität“. Hüt liit dä durchschnittlich Energieverbruuch i dr Schwiiz bi gägä 6000 Watt pro Pärson und Jahr, nachdem mär im Jaahr 1947 tatsächlich no ä 2000 Watt Gsellschaft gsi sind. Wie rasch sich die nötig Verbesserig vo dr Energieeffiziänz dur Aapassigä vo dä Infraschtruktuurä vorallem im Bousektor und dur Gräät mit besserem Würkigsgraad erreichä laat, isch hüt än Schtriitpunkt i dr Energiepolitik und i dä Positionä vo dä politischä Parteyä.

 

Zum Energieverbruuch vom Einzelnä no folgendes: Dr Al Gore bruucht gemäss Recherchä vo dr Associated Press i siinerä Mansion in Nashville Tennessee, mit ärä gheiztä Schwümmhallä, fascht 200'000 Kilowattschtundä, öpä 10 mal meh als än durchschnittlichä Huushalt i därä Gägend. Aber är hät, wie au dä Google Milliardär Sergey Brin, wo mit ärä eignä Boeing 767 dur d’Wält jetted, än absoluut reins Gwüssä. Beidi Härrä bezeichnet sich als CO2 neutraal, will sie ihrä hochi Energieverbruuch mit äm Chauf vo CO2 Zertifikaat kompensiert händ. Sonigi Zertifikaat wärded hüt vo Firmä und Organisationä verchauft, wo däfür Böim pflanzed oder sich bi Windenergieprojekt engagiered. Das gaht in Amärika scho so wiit, dass dä Nobel Schii Resort Vail in Colorado neuerdings mit dä Botschaft wirbt: “All Skilifts and Lodges are 100% powered by wind“. Wänn die Entwicklig au bi öis Schuel macht, dänn wärded die Frauä wo mit ihrnä Sport Utility Vehicles i d’Schtadt zum Iichauffä fahred scho bald ämal än grossä Chläber “CO2 Neutral“ a ihri Chärrä klöibä. Öb sie damit dä grösser Biitrag zur Reduktion vo dä Kliimaärwärmig als zur Förderig vonerä Zweiklassä-gsellschaft leischtet bliibt vorderhand offä. Dä Klima-Ablasshandel zum Freychaufä vo Umwältsündä schtoosst vermehrt uf Kritik: I dä nöischtä Schpiegel Schpezialuusgaab zum Thema “Neue Energien“ schpottet under äm Titel “Büssen mit Bäumen“ än Verträter vo dä Cambridge University: “Den Leuten zu empfehlen Bäume zu pflanzen, ist doch genau so sinnvoll wie der Ratschlag, gegen den steigenden Meeresspiegel mehr Wasser zu trinken“.

 

Die Klima- und Energiedebattä wo gägäwärtig öises Land und fascht die ganz Wält bewegt, zeiged aber au, dass öisi Medieundernähme ihri gross Verantwortig für ä värschtändlichi, objektivi, faktäbasierti Brich-tärschtattig und Analysä - vo wenigä Uusnahmä abgseh - nur ungnüegend wahrnämed. Oder händ Ihr i öierä Tagesziitig, im Radio oder im Färnseh vo anderä Meinigä, wie die vom Profässer Lindzen oder vom Björn Lomborg, scho mal öppis ghört? Dä Roger de Weck, susch nöd grad miin Fründ, hät letschti doch die sehr berächtigti Fraag gschtellt: “Wie viel Alarmismus verträgt der Mensch?“ Vill, isch siini Antwort und är meint, dass dr Schwiizer dä Zämmähalt vo öiserä Willensnation fördered, wänn är zu jederä Ziit üsserschti Gfaahrä mues abwändä. Är ärchlärt dä Alarmismus aber au mit äm grossä Konkurränzkampf under dä värschiedenä Präss- und Medieprodukt. Wär i dä Medie wot beachtet wärdä, mues übertriibä und mir händ ja verschiedeni Medieprodukt wo guet dävo läbäd immer wieder Alarm z’schlah.

 

Die verschiedenä Publikumsmedie Ziitigä, Ziitschriftä, Radio und Färnseh wärded jetzt au no immer meh dur s’Internet bedrängt. Sälbscht dä Bundesraat Blocher hät ja chürzlich siin eigene Internet Blog äröffnet und füehrt jetzt mit interessiertä Bürger än diräktä Dialog und fiiret deet uusfüehrlich sin Ärfolg mit dä CO2 Abgaab.

 

Ich chumä zum Schluss und schtellä d’Fraag, wie mir jetzt als Land und als Bürger vo dä Schwiiz dene Heruusforderigä chönd begägnä: Miini Empfehligä fass ich i föif Pünkt zämmä:

 

1. Mir müend d’Klimaveränderigä wiiterhin ufmärksam värfolgä und analysierä, aber nöd i Panik uusbrächä;

 

2. D’Politik - und damit miir a dr Urnä - hät d’Uufgaab Rahmäbedingi-gä z’schaffä, dass mer dä CO2 -Uuschtoss chönd reduzierä. Äs bruucht meh Aareiz für privaati Inveschtitionä und weniger schtaatlichä Vorgaabä und Verbot;

 

3. Mir müend di erneuerbaarä Energiä förderä und zwar wiederum mit Aareiz für privati Inveschtitionä i Forschig und Entwicklig und mit Risikokapital vo öisnä Finanzinschtituut, - so wie das hüt a dr amärikanischä Weschtküschtä passiert;

 

4. Um d’Energieversorgig i öisem Land langfrischtig sicherz’schtellä, müe mir d’Plaanig vo dä Altärnatiivä, im Vordergrund schtaht hüt sicher no d’Kärnenergie, zügig voraatriibä; und

 

5. Jedä Einzelni mues und chan Energie schparä und zwar ohni Iibuess vo dä Läbäs-qualitäät, i dem mir bim Ärsatz vo Grät und Maschinä energieeffiziänteri Produkt chaufäd und öisä pärsönlich Energieverbruuch immer wieder sälbschtkritisch hinderfrööged.

 

Nach dem Exkurs i d’Klima- und Energiepolitik vo dä ganzä Wält und vo öisem Land chum ich jetzt wieder zrugg uf die Klimafraag wo hüt öis Zürcher am meischtä beschäftiged: s’Wätter am Sächsilüütä, wie lang brännt dä Böögg und was für än Summer ärwartet öis.

Dä Bernard Primault, Zöifter vo öisere Göttizouft Zimmerlüütä, hät s’Wätter a dä Sächsilüütä i dä Ziitpäriodä vo 1864 bis 1978 nach dä värschiedenschtä Kriteerie analysiert und siini Arbet gipfläd i dä absolut umwärfände Schlussfolgerig, ich zitierä: “Die Zünfter können getrost ihrem Frühlingsfest entgegen sehen, sie erleben meist gutes bis normales Aprilwetter“.

Sit därä gwichtigä Prognosä sind jetzt fascht 30 Jaar is Land gangä. S’letscht Jaahr hät s’Bundesamt für Meteorologie und Klimatologie dä Bricht 213 publiziert. Dä Bricht treit dä beiidruckendi Titel “Saisonale Vorhersage in Tradition und Moderne: Vergleich der Sommerprognose des Zürcher Bööggs mit einem dynamischen Klimamodell“. Die Schtu-die chunnt zum nöd unärwartetä Schluss, dass äs kän schtatistisch Zämmähang zwüsched dä Brännziit vom Böögg und dä durchschnittlichä Summertemperatuur oder dr Aazahl Summertaag git. D’Vorhärsaag uf grund vo dä Brännziit vom Böögg isch nöd besser als wänn eifach nu graatet wird, --- das isch öis Zöifter scho lang klar, aber au völlig egal.

 

S’dynamisch Wättermodäll vo dä Meteo Schwiiz schniidet tüütlich besser ab als d’Böögg Prognosä, aber mit ämä Korrelationsfaktor vo 0.24 (än Faktor 1 wär ä perfekti Prognosä) isch au d’Meteo Schwiiz Prognose sehr bescheidä. --- Als langjährigs Mitglied bi dä Muotathaler Wätterprofeetä, han ich natüürli doch no meh Vertrouä i dene ihri Langziitprognosä, die ja uf Natuurbeobachtige vo Pflanzä und Tier uufbouäd. D’Muotathaler verschtönds au ihri Prognosä volksnah und für alli verschtändlich z’formuliäre; einä hät sogar profezeyt, dass I dr erschte Helfti März villi Lüüt wärdid i d’Hose seiche, will sie vor Chelti nümme im Schtand sind dä Hoseschlitz uufz’mache. Die Sorgä hämmer hüt sicher nööd und drum nimm ich jetzt miin Bächer und trinkä uf ä värnünftigi Klima- und Energiepolitik i öisem Land und uf dä ganzä Wält, uf öisi Fründschaft mit äm Gaschtkanton Zuug, uf öisi Schtadt Züri und uf ä schööns Sächsilüütä.